Comisiynydd Dyfodol Cynaliadwy Cymru

Gwnaeth Peter Davies (gynt yn Gomisiynydd Cymru y Comisiwn Datblygu Cynaliadwy) ddechrau ei swydd newydd fel Comisiynydd Dyfodol Cynaliadwy ar 1 Ebrill 2011.

Yn dilyn diwedd y Comisiwn Datblygu Cynaliadwy, ar ddiwedd mis Mawrth 2011, mae'r Comisiynydd Dyfodol Cynaliadwy newydd yn rhoi cyngor i Lywodraeth Cymru ac yn rhoi arweiniad ar ddatblygu cynaliadwy drwy Gymru.

Caiff swyddogaeth y Comisiynydd ei gefnogi gan Cynnal Cymru, gan alluogi safbwyntiau a phrofiadau’r gymuned ehangach yng Nghymru i gael eu rhannu gyda’r Comisiynydd a’u bwydo fewn i’w gyngor i lywodraeth.

Mae dyletswydd gyfreithiol ar Lywodraeth Cymru yng nghyswllt Datblygu Cynaliadwy, a bydd y trefniadau hyn yn hanfodol i'w helpu i gyflawni ei hymrwymiad i ddatblygu cynaliadwy fel ‘prif egwyddor drefniadol.’

Bydd y Comisiynydd yn helpu Llywodraeth Cymru ac eraill i roi gwell ansawdd bywyd i bobl Cymru yn awr ac yn y tymor hir. Bydd hefyd yn rhoi llais i genedlaethau'r dyfodol, a fydd yn gorfod byw gyda chanlyniadau'r penderfyniadau a wnawn ni heddiw.

Rolau’r Comisiynydd yw:

• Rhoi arweiniad ar ddatblygu cynaliadwy yng Nghymru;
• Hyrwyddo datblygu cynaliadwy fel prif egwyddor drefniadol ym mhob sefydliad yng Nghymru, a hyrwyddo mewnosod datblygu cynaliadwy i waith sectorau a chymunedau yng Nghymru, yn unol â'r ymrwymiad polisi yng Nghynllun Datblygu Cynaliadwy Llywodraeth Cymru, Cymru'n Un: Cenedl Un Blaned;
• Cynnull rhanddeiliaid sy'n cynrychioli sectorau neu faterion perthnasol, a datblygu partneriaethau i ymateb i faterion anodd ar sail 'cynghrair o'r rhai sy'n barod i wneud';
• Cynghori Llywodraeth Cymru ar y polisïau a'r dulliau y mae eu hangen i hyrwyddo a gweithredu datblygu cynaliadwy; a
• Darparu cyngor priodol i Lywodraeth Cymru ar y trefniadau tymor hwy ar gyfer hyrwyddo a chynghori Llywodraeth Cymru ar ddatblygu cynaliadwy yng Nghymru.