Adroddiad Cynnydd Blynyddol 2012 y Pwyllgor ar Newid yn yr Hinsawdd

Mae adroddiad cynnydd 2012 y Pwyllgor ar Newid yn yr Hinsawdd yn ystyried tueddiadau o ran allyriadau dros y flwyddyn ddiwethaf ac yn gwerthuso cynnydd sylfaenol o ran gweithredu mesurau a pholisïau lleihau carbon yn y DU.  Mae’n asesu perfformiad polisïau’r llywodraeth o ran lleihau allyriadau - gan gynnwys meysydd fel Diwygio’r Farchnad Drydan, y Fargen Werdd a Dal a Storio Carbon. 

Mae’r adroddiad wedi canfod bod Allyriadau Nwyon Tŷ Gwydr wedi gostwng 7%. Fodd bynnag, 0.8% yn unig o hyn y gellir ei gysylltu’n uniongyrchol â gweithredu mesurau gostwng carbon rhagweithiol. Mae hyn yn golygu bod cyfradd y cynnydd sylfaenol ond yn chwarter yr hyn sydd ei angen i fodloni targedau carbon yn y dyfodol. Mae’r adroddiad hefyd yn amlygu’r heriau sy’n parhau ar draws meysydd allweddol, sef: diffyg buddsoddiad mewn ynni adnewyddadwy a phŵer carbon isel; effeithlonrwydd ynni a gwres adnewyddadwy mewn adeiladau; a chludiant a theithio glanach.