Asesiad o Risgiau Newid Hinsawdd i Gymru

Mae’r Asesiad o Risgiau Newid Hinsawdd i Gymru yn adroddiad yn rhoi asesiad o’r risgiau a’r cyfleoedd y gall Cymru eu hwynebu am weddill y ganrif hon yn sgil y newid yn yr hinsawdd.

Yn ôl Deddf Newid Hinsawdd 2008, mae gofyn Asesu Risgiau Newid Hinsawdd ar lefel y DU bob pum mlynedd.

Mae’r adroddiad yn rhoi trosolwg o’r effeithiau a bennir fel y rhai pwysicaf.

Mae’r canlyniadau yn dangos mai’r risgiau canlynol yw’r rhai mwyaf sylweddol y gallai Cymru eu hwynebu yn sgil y Newid yn yr Hinsawdd:

• Mwy o farwolaethau a salwch oherwydd tywydd poeth;
• Newidiadau i gyflwr pridd, bioamrywiaeth a’r tirlun oherwydd tywydd mwy poeth a sych dros yr haf;
• Afonydd yn llifo’n llai a llai o ddŵr ar gael dros yr haf, gan effeithio ar y cyflenwad dŵr a’r amgylchedd naturiol;
• Mwy o lifogydd ar hyd yr arfordir ac ar y tir, a fydd yn effeithio ar bobl, eiddo a seilwaith;
• Newidiadau i esblygiad arfordirol, gan gynnwys erydu a chywasgu arfordirol, sy’n effeithio ar draethau, ardaloedd rhynglanwol a nodweddion arfordirol eraill;
• Newidiadau i rywogaethau gan gynnwys llai o rywogaethau brodorol, newidiadau i batrymau mudo a mwy o rywogaethau estron a goresgynnol;
• Yn fwy tebygol y bydd plâu a chlefydau’n effeithio ar y sectorau amaethyddol a choedwigaeth. Mae’r risg i dda byw yn destun pryder yn arbennig.

Gallai’r cyfleoedd mwyaf sylweddol i Gymru gynnwys:

• Datblygu porfa sy’n fwy cynhyrchiol, gan gynnig cyfle i wella cynhyrchiant da byw;
• Denu mwy o dwristiaid a thymor twristiaeth hwy;
• Llai o salwch a marwolaethau yn gysylltiedig â thywydd oer.